Óskiljanlegur fréttaflutningur

Ég á afskaplega bágt með að skilja þennan fréttaflutning.  Það er verið að tala um sérstaka rannsókn á hugsanlega stærsta og víðtækasta sakamáli á Íslandi og þó víðar væri leitað.  Þar sem um er að ræða hugsanlegar upphæðir sem leika á þúsundum milljarða króna og það er verið að hamast út af smáaurum til að rannsaka þessi ósköp!  Mér sýnist þessar 67 milljónir vera eitthvað um 1/10.000 af þeirri upphæð sem ég sá einhversstaðar um það hvað IceSave kostaði eða kemur til með að kosta skattgreiðendur á Íslandi, í Bretlandi og í Hollandi. 

Fólk hefur krafist rannsóknar á hvað í ósköpunum skeði á Íslandi síðasta áratug.  Fólk hefur talað um að engu megi til spara til að komast til botns í hvað fór svo herfilega úrskeiðis.  En þegar loksins einhver skriður kemst á þessa rannsókn þá hlaupa allir up til handa og fóta og kvarta undan því að það þurfi að borga þeim sem sjá um þessa rannsókn.  Vilja íslendingar virkilega bíða eftir því að þeir fái einhverskonar ölumusu frá erlendum sérfræðingum og þurfi ekki að borga?  Ég bara skil ekki alveg...

Kveðja frá Port Angeles, Washington.

Tengiliður Evu Joly kostar 6,7 milljónir

Athugasemdir

[Finnur Bárðarson, 4.4.2009 kl. 16:26]

Ráðamenn hafa bara engan áhuga á að hún fari að handtaka og yfirheyra fólk. Í þeim hópi yrðu m.a. stjórnmálamenn og embættismenn. Skil að þeim hugnist það ekki. Þetta er allt sett á svið til að sýnast.

[Brattur, 4.4.2009 kl. 17:01]

Það eru margir Íslendingar sem binda miklar vonir við rannsókn Evu Joly... en svo eru einhverjir sem eru hræddir og reyna að gera allt tortryggilegt varðandi rannsóknina... svo er spurningin, vinnur hið Góða eða hið Illa?

[Arnór Baldvinsson, 4.4.2009 kl. 18:32]

Sammála, en samt...  Ég vona að þessi rannsókn fari sem fyrst af stað og af fullum þrótti.  Það sanna í þessum málum öllum verður að koma fram svo fólk geti unnið úr sínum málum og horft til framtíðar.  Þó ég búi ekki á Íslandi lengur, þá get ég rétt ímyndað mér hvernig þessi óvissa fer með fólk.  Það verður að grafa upp sannleikann í þessum efnum þó það sé skítaverk og kosti peninga. 

Ég skil að það séu öfl sem eru andstæð því að þetta sé rannsakað en það getur ekki nokkur heilvita maður haldið að eitt mesta bankahneyksli sögunnar, ekki bara á Íslandi, verði bara sópað undir teppið og það gleymist!  Einhverjir voru ábyrgir, beint eða óbeint, fyrir því hvernig þetta fór og eftir því sem maður sér meira þá virðist svo vera sem örfáir aðilar hafi komist yfir íslensku bankana til að nota þá sem persónulega sparibauka sem þeir hreinlega tæmdu með því að lána sjálfum sér og skyldum aðilum allt eigið fé bankanna. 

Kveðja

[Brattur, 4.4.2009 kl. 21:05]

Já, og það sem verra er, þeir veðsettu fólkið í landinu án þess að fólkið vissi af því... ef menn og konur hefðu áttað sig á því er ekki víst að það hefði verið klappað svona mikið fyrir útrásarvíkingunum...

[Guðmundur St Ragnarsson, 4.4.2009 kl. 22:35]

Sammála þessari grein þinni Arnór. Rannsóknarblaðamennskan í sinni tærustu mynd á Íslandi. Hvaða máli skiptir þetta? Blaðamenn farið að velta við einhverjum alvöru steinum eða finnið ykkur annað starf!!!!!!!!!!!