Faldar fréttir

Þessi frétt er eiginlega fyrir neðan allar hellur.  Hér er haldið af stað með hálfkveðnar vísur um tryggingar á innistæðum íslendinga sem eiga einhverja aura í bönkunum.  Fréttamenn verð að fara að vakna upp af Þyrnirósarsvefni sínum og byrja að hafa sjálfstæða hugsun og grandskoða það sem þeir eru  mataðir á af stjórnmálamönnum eða málsvörum þeirra.  Fréttir eru birtar án þess að reynt sé að gera neitt til þess að staðfesta þær.  Gera fréttamenn sér enga grein fyrir því hvað frétt eins og þessi getur þýtt fyrir innistæðueigendur? 

Nú er allt í einu komið algjörlega annað hljóð í strokkinn en verið hefur síðan bankarnir hrundu með tilheyrandi flugeldafári í Október.  Nú eru íslenskar innistæður "tryggðar þar til annað hefur verið boðað" og "Fyrr eða síðar mun fyrirkomulagið þó koma til endurskoðunar"  Eitthvað er að breytast en þessum ágætu fréttamönnum dettur ekki í hug að setja undir sig hausinn og grafa upp hvað er að breytast, hvers vegna og hvaða áhrif það mun hafa. 

Mér finnst að fjölmiðlar á Íslandi hafi lýst sig allt of mikið stikk frí af ábyrgð á bankahruninu.  Íslenskir fjölmiðlar upp til hópa löptu upp sömu gömlu fréttirnar af velgengninni á Íslandi árum saman, meðan "velgengnin" var í rauninni ekki til - spilaborg sem gat ekki annað en hrunið og margir bentu á löngu fyrir banka hrunið.  Ef til vill var það vegna eignatengsla spilaborgarmanna á fjölmiðlunum, sem leiðir aftur hugann að hvernig sé hægt að koma í veg fyrir að blaðamenn séu undir hæl eigenda fjölmiðla þannig að fjölmiðlarnir séu njörvaðir niður og verði að fá leyfi eigenda til að vinna vinnuna sína.  Þetta er ekkert annað en spilling og íslensku fjölmiðlarnir voru og eru með í spillingunni.

Kveðja,

 

Tryggðar þar til annað verður boðað

Athugasemdir

[Agla (IP-tala skráð) 23.7.2009 kl. 16:15]

Þjónustu fulltrúi Landsbankans sagði mér tveimur vikum eftir hrunið að "Lögum samkvæmt eru innistæður hjá okkur tryggðar upp að 20.887,00 EVRUM en þeir segja að þær séu tryggðar að fullu."

Þetta er ekkert nýtt hljóð í strokknum.. Þetta er bara eitt af því sem ekki hefur komist upp á BORÐIÐ ennþá.

Þessi "frétt" Morgunblaðsins sýnir hvað fjölmiðlaþjónusta okkar er á lágu stigi en það ætti ekki að koma neinum á óvart.  

[Arnór Baldvinsson, 23.7.2009 kl. 17:28]

Agla, 

Fyrir mér er það vissulega nýtt hljóð í strokknum að _ráðamenn_ séu nú farnir að setja varnagla við fullri tryggingu á íslenskum innistæðum.  Af því sem þú segir þá virðast bankarnir hafa tekið þann pól í hæðina að íslenskar innistæður væru tryggðar að fullu, jafnvel þó lög geri ekki ráð fyrir meiru en EES segir til um (sem ég veit ekki hvort stenst íslensk lög, en er sennilega rétt gagnvart EES/ESB) 

Þar sem ég hef búið erlendis í rúm 13 ár þá kemur svona fréttaflutningur mér á óvart, sérstaklega þegar er um að ræða jafn stórt mál og þetta.

Kveðja,

[Agla (IP-tala skráð) 23.7.2009 kl. 18:54]

 Velkominn heim, Arnór. Kannski reddast þetta allt saman.