Fjárfesting???

Af hverju í ósköpunum ættu lífeyrissjóðir eða aðrir fjárfestar að hafa áhuga á marggjaldþrota fyrirtæki, sem hefur ekki sýnt að þar sé nokkur maður með peningavit undanfarna áratugi?  Eftir þessa menn liggur slóð gjaldþrota og hamingjan má vita hvað annað á eftir að koma upp úr pokahorninu.  Hundruð milljarða sem láku út úr Glitni í vasa þessara manna hurfu og allt eigið fé fyrirtækja sem þeir hafa komið að hefur gufað upp.  Ef einhver sér góðan fjárfestingarmöguleika í svona rugli þá er eitthvað mikið að.  Ef ég væri að setja peninga í fyrirtæki á Íslandi, þá væri Hagar síðasta fyrirtæki sem ég kæmi nálægt, nákvæmlega sama hver svo sem "staða" fyrirtækisins væri sögð.  Glitnir var með góða "stöðu" viku áður en bankinn fór á hausinn.  Þar sást best "rekstrarvit" þessara manna.

Kveðja,

 

Enginn áhugi lífeyrissjóða á Högum

Ömurlegt málfar

Ég get bara ekki orða bundist.

"Lögreglan í Brasilíu og Frakklandi hófu fyrr í vikunni samstarf"  Annað hvort á þetta að vera "Lögreglan í Brasilíu og Frakklandi hóf..."  eða "Lögregluyfirvöld í Brasilíu og Frakklandi hófu..."

 "Átak lögreglunnar felst í því að leitað er á alla farþega"

Ég hef nú ekki mikla trú á því að lögreglan leiti á farþegana, hef frekar trú á að hún "leiti á farþegunum" sem er svolítið annað;)

"Átak lögreglunnar felst í því að leiða er á öllum farþegum"

á þetta sennilega að vera.  mbl.is getur gert betur:)

Kveðja,

 

Líkamsleit á öllum farþegum

Bónusfé?

Spurning hvort þetta verður á boðstólum hjá Bónus?

Kveðja,

 

Stal 271 kind

Skilanefnd Landsbankans, banka allra landsmanna...

Mér þykir það furðu sæta að skilanefnd Landsbankans, sem hér áður fyrr auglýsti sig sem banka allra landsmanna, skyldi ekki geta fundið neinn hentugri fulltrúa til að sitja í stjórn Iceland heldur en Jón Ásgeir Jóhannesson.  Bankinn er í eigu ríkisins ef ég þekki rétt, eða a.m.k. var hann í eigu ríkisins, og það mætti ætla að það hefði verið leitað að hæfum mönnum með reynslu í viðskiptum.  Hvorugt hefur Jón Ásgeir, eða aðrir í Baugs&Bónus apparatinu sýnt þar sem þeim hefur tekist að keyra hvert fyrirtækið á eftir öðru í svimandi gjaldþrot undanfarin ár. 

Af einhverjum ástæðum, mér (og sjálfsagt fleiri) algjörlega óskiljanlegum, er þessu mönnum treyst.  Það virðist sem að þeir sem geta sett upp stærstu gjaldþrotin séu taldir stærstir og þeir sem sýna mesta tapið séu mestir.  Þetta stangast virkilega á við þann kapítalisma sem ræður hér í Bandaríkjunum og maður veltir fyrir sér hvaða efnahagsformúlur þessir menn á Íslandi hafa lært.  Ekki kemur hún frá gömlu kommúnistunum, því jafnvel þeir voru mun betur að sér heldur en þetta!  En það er augljóst að hjá þessum mönnum er tap eftirsóknarvert, gjaldþrot óumflýjanleg og sviksemi telst til dyggða. 

Maður furðar sig lítið á að það skuli vera komið eins og er fyrir Íslandi með svona hundalógik í farteskinu!

Kveðja,

Segir að Jón Ásgeir muni hætta í stjórn Iceland

Stefna Skilanefndar Glitnis

Ég hef setið við og pælt í gegnum alla stefnu Skilanefndar Glitnis gegn Jóni Ásgeiri og 6 öðrum ásamt PricewaterhouseCoopers.  Þetta er ógnvekjandi lesning og hausinn á mér er að springa eftir þetta.  

Í 296. málsgrein í 12. dómskröfu segir "Plaintiffs have no adequate remedy at law", sem ég leyfi mér að þýða sem: "Stefndu hafa enga vörn að lögum".  Mér finnst þessi setning sýna málið í hnotskurn.  Þessir menn stálu bankanum og öllu steini léttara í þeim fyrirtækjum sem þeir komu nálægt. 

Eyðimerkurdrengirnir skildu eftir sig sviðna jörð hvar sem þeir fóru um.  Og það var ekki eitthvað sem skeði fyrir slysni, þetta var skipulagt og stjórnað af Jóni Ásgeir sem keypti menn til þjónustu ef þeir voru óþekkir. 

Hundruð milljarða króna var veitt framhjá innra eftirliti bankans og þeim var stundum ekki sagt fyrr en eftir nokkrar vikur um lán frá bankanum sem voru svo stór að bankinn riðaði á barmi gjaldþrots.  Það var "lánað" út og suður og aldrei borgað neitt.  Þannig var bankinn þurrausinn hvað eftir annað til að pumpa upp "veldi" Jóns sem var alltaf á fallandi fæti hversu miklum fjármunum sem Glitnir var látinn blæða. 

Hvar ætli þessir fjármunir hafi endað?  Ekki enduðu þeir í þeim fyrirtækjum sem eyðimerkurdrengirnir ráku, svo mikið er víst því þau voru öll að fara eða farin yfir um þegar bankinn tæmdist loks endanlega.  Þessir menn "keyptu" Ísland en það var bara allt út á krít!

Kveðja,

 

Birt eða ekki birt

Ég sé ekkert í frétt Guardian sem segir að Jóni hafi verið birtar stefnan!  Hinsvegar telst stefnan birt hérna í Bandaríkjunum þegar hún hefur verið skráð og er þar með almennt og aðgengilegt skjal.  Þetta kom m.a. fram á fréttamannafundi skilanefndar í gær.  Það er alla vega ekkert sagt um að Jóni hafi verið birt stefnan í New York enda mun Jón vera í Bretlandi! 

Kveðja,

 

Guardian: Búið að birta stefnuna

Afburðar klúðurslega orðað

Í fréttinni segir:  "Tók hann fram að ráðstöfunin myndi gilda eins lengi og þurfa þyrfti. "

Það sem ég hnýt um er "þurfa þyrfti"  Hér í gamla daga var sagt eins og "þurfa þykir"  og þetta ætti því að vera "Tók hann fram að ráðstöfunin myndi gilda eins lengi og þurfa þætti."  mbl.is getur gert betur en þetta:)

Kveðja,

 

Askan hindrar flug í Þýskalandi

Er einhver hissa?

Ég skil það vel að kröfuhafar í BYR hafi verið lítið hrifnir af því að stofnfjáreigendur ættu að fá meira en þeir og að eigendur víkjandi skuldabréfa ættu að fá eitthvað.  Það er ástæða fyrir því að þetta eru víkjandi bréf!

Mér sýnist að hér sé verið að reyna að hagræða og hygla einhverjum sem ekki eiga rétt á því á kostnað þeirra sem eiga rétt.  Hverjir skyldu eiga þessar eignir sem ekki mega tapast? 

Kveðja,

 

Erlendir kröfuhafar Byrs gengu fúlir af fundi

GM í kröppum dansi

Hér í Bandaríkjunum er mikill fjöldi fólks sem lítur bíla frá General Motors miklu hornauga vegna þess að ríkið tók yfir hluta félagsins og GM fékk milljarða dollara til að rétta sig við, eftir gjaldþrot og mikla endurskipulagningu.  Það er allsendis óvíst hvort GM hefur möguleika á að rétta úr kútnum og villandi auglýsingar eiga örugglega ekki eftir að hjálpa þeim!

Kveðja,

 

Villandi auglýsingar GM harðlega gagnrýndar

Óreiða í Grikkland

Ég heyrði viðtal á CBC núna seinni partinn í dag við hagfræðing sem starfaði hjá Alþjóða gjaldeyrissjóðnum, en er nú prófessor í hagfræði við háskóla í Kanada, um ástandið í Grikklandi.  Þar kom m.a. fram að skuldasöfnun hefur verið gífurleg undanfarin ár.  Skattheimta er afburða slök og mikið um undanskot og jafnvel mútur í sambandi við skatta.  M.a. kom fram að í tilraun til þess að leggja skatt á hina efnameiri var lagður skattur á sundlaugar í íbúðahverfum.  350 skiluðu skatti meðan á sama tíma sýndu loftmyndir að yfir 17 þúsund sundlaugar voru í íbúðahverfum (held þetta hafi verið í Aþenu)  Líka var bent á að á Grikklandi væru afskaplega fáir sem teldu fram háar tekjur, þ.e. yfir milljón dollara, á meðan í öllum öðrum löndum Evrópu er hlutfallið margfalt hærra en í Grikklandi.  Þá kom líka fram að eftirlaunaaldur opinberra starfsmanna (civil servants) er 57 ár og þeir fá greidd laun fyrir 14 mánuði á ári! 

Það verður fróðlegt að sjá hvernig rætist úr þessu, en Grikkir eru að mörgu leyti í verri málum en Íslendingar að mér sýnist.  Ég held að Íslendingar geti unnið sig út úr þessum vanda, en ég er ekki svo viss um Grikki.

Kveðja,

 

Grikkland stendur nú „á barmi hyldýpisins“